Author: Sandy

നീയില്ലാതെ എനിക്കൊരു അസ്തിത്വം ഇല്ല എന്ന് തോന്നുന്നു. മറ്റുള്ളവർ എനിക്ക് നൽകിയ സ്നേഹവായ്പുകൾ നിന്നോടുള്ള ഇഷ്ടത്തിന്റെ ഒരു അംശം മാത്രമെന്ന്- തിരിച്ചറിഞ്ഞ നിമിഷം എല്ലാവരും എന്നെ അനാഥയാക്കി പോയി. നീ ഈ പൊഴിഞ്ഞ താരകത്തെ കൈവിട്ടു എന്നവർ മനസ്സിലാക്കിയിരുന്നു. അവർ സ്നേഹിച്ചത് നീയെന്ന ആകാശത്തെ മാത്രമായിരുന്നു! എനിക്കായ്...

അവസാനമായി എന്റെ സ്വപ്നത്തിൽ ഒരു മഴ പെയ്തു തോർന്നപ്പോൾ പെയ്തൊഴിയാൻ കണ്ണുകളിൽ- വിതുമ്പിനിന്നൊരു കണ്ണുനീർത്തുള്ളി എന്റെ കൈത്തലത്തിൽ വന്നു വീണു. പെട്ടെന്ന് കയ്യെടുത്തു മാറ്റിയ ഞാനറിഞ്ഞു അത് ഒരു മഴത്തുള്ളിയാണെന്ന്. പെട്ടെന്ന് ആർത്തലച്ചു ഞാനും പെയ്തൊഴിഞ്ഞു ഒരു മഴമേഘമായ് അവസാനത്തെ തുള്ളി ഹൃദയത്തിൽ സൂക്ഷിച്ചുവച്ചു, എല്ലാവരിൽ നിന്നുമൊളിപ്പിച്ച്....

ഒരിടത്തൊരിക്കൽ ഒരു അമ്പിളി ഉണ്ടായിരുന്നു അവളുടെ ഹൃദയം തകർന്നതായിരുന്നു. ചുറ്റും നിന്ന് തിളങ്ങിയ താരങ്ങളോട് അവളുടെ ഹൃദയവേദന പറയുമായിരുന്നു മുറിവേറ്റ ഹൃദയം കാട്ടി കരയുമായിരുന്നു. സ്വയം കത്തിജ്വലിച്ചുനിന്ന താരങ്ങളെല്ലാം മുതലക്കണ്ണീർ കാട്ടി അവളെ വിശ്വസിപ്പിച്ചു, അവളുടെ അവസ്ഥയിൽ അവർക്ക് ദുഃഖമുണ്ടെന്ന്. എന്നാൽ സത്യത്തിൽ അവളെ ആരും- തിരിഞ്ഞുനോക്കിയില്ല...