മൗനം വാചാലം

“എന്റെ മൗനത്തിനു സംഗീതം നൽകാൻ വാക്കുകൾ പകരാമോ?” 

“വാക്കുകൾക്കായി അവൾ പരതി നടന്നു
മൗനം അവളെ വിലയ്ക്ക് വാങ്ങിയപ്പോൾ…..”

“ഒരു നിമിഷത്തെ മൗനത്തിൽ നിശ്ചലയായാൽ തിരിച്ചറിയപ്പെടുമോ എന്ന ഭയം – വാചാലത്തിന്റെ നിർവ്വചനങ്ങളിൽ ഒന്ന്.
#വാചാലം #പൊയ്മുഖം “

“ഒരു മൊഴിപോലും തിരിച്ചവൻ പറയാത്തവൾ ഓർത്തു
മൗനം കൊണ്ട് എല്ലാത്തിനും കടം വീട്ടിയതാവാം”

“മൗനം കൊണ്ട് മുറിയുന്ന വാക്കുകൾ
കണ്ണുകളാൽ പറയുന്ന കവിതകൾ
വേദനയാൽ എരിഞ്ഞടങ്ങും മോഹങ്ങളും
പിന്നെ ബാക്കിയാവുന്നു
നിറമൊഴിഞ്ഞ താളുകളും”

“മൗനം ഏറ്റവും വലിയ ആയുധമാകുന്ന അവസരങ്ങളുണ്ടാകാം, ശിക്ഷകളും……”

“എൻ മൗനത്തിൽ എൻ കണ്ണീരിൽ ഒതുക്കുന്ന പലതും
സർവേശ്വരന് ചെയ്തു തീർക്കാനുള്ള കർമങ്ങൾ മാത്രമായതുകൊണ്ട്   “

“വാചാലരുടെ പ്രശംസയെക്കാൾ മൗനികളുടെ നിശ്ശബ്ദതയിലാണോ സത്യസന്ധത കൂടുതൽ?”

“മൗനത്തിൽ ചാലിച്ച ഒരു ചെറു പുഞ്ചിരി
മൗനത്തിൽ ഒളിപ്പിച്ച ഒരായിരം കഥകളും “

“ഒരുപാട് മിണ്ടുന്ന മൗനങ്ങൾ”

“ഒരു നിമിഷത്തിന്റെ മൗനത്തിൽ എല്ലാം അവസാനിക്കുന്ന ചിലതുണ്ട് ഈ ലോകത്തിൽ”

“ചിലർക്ക് വാക്കുകൾ പോലും വേണമെന്നില്ലല്ലോ…..
മൗനത്തിൽ അവസാനിപ്പിക്കുന്നു എല്ലാം”

“എന്റെ മൗനത്തിന്നാഴങ്ങൾ നിനക്ക് മാത്രം സ്വന്തം”

“നിശബ്ദതയാണ് ചിലപ്പോൾ ഏറ്റവും നല്ല മരുന്ന്….”

“ഞാൻ മൗനിയായിരുന്നു
അതിനർത്ഥം എന്റെ ഹൃദയം സംസാരിച്ചില്ല എന്നതല്ല”

“എന്റെ വാക്കുകളിൽ തങ്ങിനിൽക്കുന്ന മൗനങ്ങളെല്ലാം
നിനക്കുമാത്രമാണോ സ്വന്തം?
എനിക്കുമില്ലേ അവകാശം?
എന്റെ മൗനങ്ങളിൽ നിന്നും അടർന്നുവീണ വാക്കുകളും
തുളുമ്പാൻ കൊതിക്കുന്ന വാക്കുകളും
നീ എന്നേ സ്വന്തമാക്കി കഴിഞ്ഞു”

“മൗനത്തിൻ പുതു അധ്യായങ്ങൾ രചിച്ച്,
മൗനത്തിനു പുതിയ അർത്ഥങ്ങൾ നൽകി,
നമ്മളിരുവരും നമ്മുടെ കഥകൾ രചിച്ച്
കണ്ടുമുട്ടുമായിരിക്കാം ഒരുനാൾ
വാചാലത്തിൻ ഏതെങ്കിലുമൊരു നാൽക്കവലയിൽ.
അന്ന്, ഞാൻ നിന്റെ മൗനങ്ങളോട് യുദ്ധം ചെയ്തതും,
നീ എന്റെ മൗനത്തോട് വഴക്കിട്ട് പോയതും ചൊല്ലി
ഒരുപാട് ചിരിക്കുമായിരിക്കാം”

“മിഴിവാർന്ന മൗനത്തിലെന്നനുരാഗമൊളിപ്പിച്ച്
വാചാലമാമെന്നുടെ വാക്കുകളിൽ
നിനക്കുള്ള സ്നേഹം തിരയുകയാണല്ലേ?
എനിക്കത് മനസ്സിലായിട്ടുണ്ട്”

“വാക്കുകൾ തികയാതെ വരുമ്പോൾ ചിലപ്പോഴെങ്കിലും മൗനങ്ങളെ കടമെടുക്കാറുണ്ട്”

“മൗനങ്ങളിലും നോട്ടങ്ങളിലും അലിയിപ്പിച്ച എന്നിലെ വാക്കുകൾ”

“ഒരു മൗനത്തിൽ ചുരുങ്ങുകയാണെല്ലാം,
ഒരു ശംഖിലെന്ന പോലെ
ആർത്തിരമ്പും തിരപോലുള്ള സ്നേഹവും,
എണ്ണിയാൽ ഒടുങ്ങാത്ത നക്ഷത്രക്കൂട്ടങ്ങളും,
ഇടിവെട്ടും മിന്നൽ പിണറുമോടെ
പെയ്ത ആ തുലാവർഷവും എല്ലാം”

“നീയെന്നരികിലുള്ളപ്പോൾ മൗനത്തിനു അർത്ഥങ്ങൾ കൂടുതലാണ്”

“മനം ചിന്തകളാൽ കലങ്ങുമ്പോൾ വാക്കുകൾ മൂർച്ചയേറിയ ആയുധമായ് മാറും
മൗനം ഔഷധത്തിന്റെ ഫലം ചെയ്യുന്നത് ആ നിമിഷങ്ങളിൽ “

“കള്ളം പറയുമ്പോഴാണോ മനുഷ്യൻ ഒരുപാട് വാചാലനാവുന്നത്?”

“എന്റെ മൗനങ്ങൾ വായിച്ചെടുക്കാൻ നിനക്കിപ്പോൾ മടിയാണോ
അതോ എന്റെ മൗനത്തിൻ ഭാഷ നീ മറന്നു തുടങ്ങിയോ?”

“ഒരു നല്ല ശ്രോതാവായതുകൊണ്ട് മാത്രം നിലനിൽക്കുന്ന ചില ബന്ധങ്ങൾ”

“മൗനം കൊണ്ട് വാക്കുകൾക്കതീതമായ ഒരു മധുര പ്രതികാരം. മൗനം കൊണ്ട് മുറിവേൽപ്പിക്കാനാണ് ഏറെ എളുപ്പം, ചിലരെയെങ്കിലും …….”

“വാക്കുകൾ അസ്തമിക്കുന്നിടത് അകൽച്ചകൾ തുടങ്ങുകയായി……   “

“നിശബ്ദമായ ചില ഉൾവിളികൾ ഉണ്ട്
ആയിരം തിരകളേക്കാൾ ശക്തമായവ
അവയുടെ നിലവിളികൾ ആരും കേൾക്കാറില്ല
ഇടനാഴികളിൽ ലക്ഷ്യമില്ലാതെ അലിഞ്ഞങ്ങനെ ഇല്ലാതാകും”

“വാക്കുകൾക്ക് വാളിനേക്കാളും മൂർച്ചയുണ്ടെന്നാണ് പറയാറ്….. എന്നാൽ മിഴികളാൽ പറയുന്ന മൗനഭാഷകൾക്ക് വാക്കുകളേക്കാൾ ശക്തിയുണ്ട് സ്വാധീനമുണ്ട്… എത്ര ദൃഢമായ മനസ്സിനെ കൊണ്ടും എന്ത് ചെയ്യിക്കാനുള്ള മാസ്മര ശക്തിയും കഴിവും!!! “

“വാക്കുകൾ കൊണ്ട് പ്രകടിപ്പിക്കാനാവാത്ത നിമിഷങ്ങളിൽ
മൗനത്തിന് വാക്കുകളേക്കാൾ അർഥമുണ്ട്….
ലോകത്തൊരു ഭാഷയിലും കണ്ടെത്താനാവാത്ത
നിഗൂഢമായ അർഥങ്ങൾ… അക്ഷരങ്ങൾ….
വാക്കുകൾക്ക് എല്ലാ മനുഷ്യവികാരങ്ങളെയും –
കുറിക്കുവാൻ കഴിയില്ല….. പറയുവാൻ കഴിയില്ല……”

“മൗനത്തിനുമുണ്ട് ചില അക്ഷരങ്ങൾ….
സ്വരാക്ഷരങ്ങളും വ്യഞ്ജനമുള്ള ഒരു ഭാഷ….
പക്ഷെ എഴുതിവയ്ക്കാനാവില്ല…
ഉരുവിടാനുമാവില്ല…..
കണ്ണുകൾ കൊണ്ട് പറയുമ്പോൾ അതിനെ
പല അർത്ഥങ്ങളിൽ വ്യാഖ്യാനിക്കപ്പെടുന്നത് അതുകൊണ്ടാവാം”

“വാക്കുകളേക്കാൾ വാചാലമാം മൗനങ്ങൾ
സത്യങ്ങൾ വാക്കുകളേക്കാൾ ഉച്ചത്തിൽ വിളിച്ചുപറയും മൗനങ്ങൾ”

“മൗനം കൊണ്ട് മുറിവേറ്റവൾ…..”

“മൗനങ്ങൾക്ക് പലപ്പോഴും കടലോളം ആഴമുണ്ട്
വാക്കുകൾ ചെന്നെത്താത്ത ഇടങ്ങൾ, ഗർത്തങ്ങൾ
അവരങ്ങു കൈയേറും.
പിന്നെ എങ്ങും നിശബ്ദതയാണ്
അലിഞ്ഞില്ലാവുന്ന തേങ്ങലുകളാണ്.
ചിലർക്കു അതൊരു അനുഗ്രഹമാണ്
ചിലർക്ക് അതൊരു ശാപവും”

“മൗനം >> ചിലർക്കു അതൊരു അനുഗ്രഹമാണ്
ചിലർക്ക് അതൊരു ശാപവും”

“നീയെന്റെ വാക്കുകളും മൗനവും ഒരുപോലെ വായിച്ചെടുത്തിരുന്നുവെങ്കിൽ “

“വാക്കുകൾ ആർക്കും കൈമാറാൻ ഒരുപക്ഷെ കഴിഞ്ഞേക്കാം
എന്നാൽ അവയോടൊപ്പമുള്ള വൈകാരികത….
അത് അനുഭവിച്ചവർക്ക് മാത്രം സ്വന്തം
ആ കാരണത്താലാണ് എത്ര ശ്രമിച്ചാലും, പലപ്പോഴും
മറ്റുള്ളവർക്ക് നമ്മളെ മനസ്സിലാക്കാൻ കഴിയാതെ പോകുന്നത്”

“മൗനങ്ങൾ ശക്തമാവുന്ന ചില ഇടങ്ങളുണ്ട്.
അതുപോലെ തന്നെയാണ് ഉച്ചത്തിലുള്ള വാക്കുകൾക്ക് പോലും
മൂർച്ചയൊടിയുന്ന ചില ഇടങ്ങൾ”

“മൗനം കൊണ്ട് മുറിവേറ്റവൾ
എങ്ങനെ മറ്റൊരാളെ മൗനം കൊണ്ട് മുറിവേല്പിക്കും”

“നിന്റെ മൗനത്തിൽ നിറയുന്നത് എനിക്കുള്ള വാക്കുകൾ മാത്രം”

“ഞാൻ മൗനത്തിലാണ്
അതിനർത്ഥം ഞാൻ സംസാരിക്കുന്നില്ല, എന്നല്ല “

“വാക്കാൽ കൊടുക്കുന്നത് മാത്രമാണോ വാഗ്ദാനങ്ങൾ?“

“വാക്കുകളുമായ് യുദ്ധത്തിലാണ്
എന്റെ മൗനങ്ങളെപ്പോഴും”

“പിറക്കാത്ത വാക്കുകൾക്ക് മൊഴിയുന്ന വാക്കുകളെക്കാളും മൂർച്ചയുള്ള ആയുധങ്ങളെക്കാളും മനസ്സിനെ വേദനിപ്പിക്കാനാവും”

“ഒരു നുണ പറയുമ്പോൾ അത് ഏറ്റുപറയാനുള്ള ധൈര്യവും ഉണ്ടായിരിക്കണം”

“മനസ്സ് പൂർണരൂപത്തിൽ തുറന്നു കാട്ടിയാലും
മനസിലാക്കാതെ പോകുന്ന ഇഷ്ടങ്ങൾ
വാക്കുകൾ കൊണ്ട് മഹാകാവ്യങ്ങൾ രചിച്ചാലും
മൗനം മാത്രം മറുപടിയായി നൽകുന്ന ചില ഇഷ്ടങ്ങൾ”

“നിശബ്ദത പോലും ഉള്ളിലൊളിപ്പിക്കുന്നില്ലേ ഒരു സംഗീതം? മൗനരാഗത്തിൽ ചിട്ടപ്പെടുത്തിയ സംഗീതം…. “

Image source: Pixabay