പോസിറ്റീവ് ചിന്തകൾ

“മനപ്പൂർവ്വമല്ലാതെ മറ്റുള്ളവർ ചെയ്യുന്ന തെറ്റുകൾ ക്ഷമിച്ചുകൊടുത്തുകൂടെ നമുക്ക്…….കുറച്ചെങ്കിലും?”

“Virtual friends-ഉം real friends-ഉം തമ്മിൽ അന്തരമില്ല എനിക്ക്. കുറച്ച് സൂഷ്മമായി നിരീക്ഷിച്ചാൽ അവരുടെ വിരൽത്തുമ്പിലൂടെ മനസ്സ് വായിച്ചെടുക്കാനാവും, കുറച്ച ക്ഷമയുണ്ടെങ്കിൽ “

“ആഗ്രഹങ്ങൾ നേടിയെടുക്കുക – ഭൂമിയിലെ ഏറ്റവും സന്തോഷമുള്ള കാര്യം.
ആ ആഗ്രഹങ്ങൾ ഉപേക്ഷിക്കാൻ മനസ്സിന് കഴിയുക – അടുത്ത് സന്തോഷമുള്ള കാര്യം”

“മറ്റുള്ളവരുടെ മുന്നിൽ കാണിക്കുന്നതല്ല സ്വയം ജീവിച്ചുതീർക്കുന്നതാണ് ജീവിതം “

“പരാജയങ്ങൾ സ്വയം ഏറ്റുവാങ്ങുമ്പോൾ പൊരുതാനുള്ള അവസാന ശ്രമമാണ് അടിയറവ് വയ്ക്കുന്നത്, തീരത്തണയും തിര പാറക്കെട്ടിൽ സ്വയം തലതല്ലിച്ചിതറും പോലെ”

“ശുഭാബ്ദി വിശ്വാസം അധികം ആയാൽ സ്വപ്നസഞ്ചാരി ആകുമോ?”

“ഇടക്കിടക്ക് ഒരു ബ്രേക്ക് ആകാം…
സങ്കടപെടുത്തുന്ന സൗഹൃദങ്ങളിൽ നിന്ന്
വേദനിപ്പിക്കുന്ന ഓർമകളിൽ നിന്ന്
ചെയ്യുന്ന ജോലിയിൽ നിന്ന്
പൂർവാധികം ഊർജത്തോടെ തിരിച്ചുവരാൻ  “

“ആയുസ്സ് നീട്ടിക്കിട്ടാൻ വേണ്ടി എന്തിനാ തിരിയുടെ വെട്ടം കുറയ്ക്കുന്നത്?
ചെറുതെങ്കിലും ഉജ്ജ്വലമായൊരു ജീവിതം ജീവിച്ചു തീർക്കണം”

“ജീവിതത്തിൽ ഒന്നും അവശേഷിക്കാതെ
എല്ലാം അവസാനിച്ചു എന്ന് തോന്നിപ്പിക്കുന്ന നിമിഷം,
ഒന്നും പ്രതീക്ഷിക്കാതെ ഒരാളെ സന്തോഷിപ്പിക്കാൻ കഴിഞ്ഞാൽ,
അതാണ് ശുദ്ധമായ സ്നേഹം”

“ഓരോ കുഞ്ഞുമോഹം നടക്കാത്തപ്പോഴും ഇതിലും നല്ലരീതിയിൽ നടക്കാനുള്ള വിധി ഉള്ളതുകൊണ്ട് എന്നങ്ങു കരുതി സമാധാനിക്കും ഞാൻ. പിന്നെ പരിശ്രമത്തിന്റെ പുത്തൻവഴികൾ…  “

“ജീവിതത്തിലെ ഓരോ കൊടുങ്കാറ്റിനെതിരെയും പടവെട്ടേണ്ട ആവശ്യമില്ല. ചിലപ്പോഴെങ്കിലും ആ ദിശയിൽ തന്നെ നീങ്ങേണ്ടി വരും, കുറച്ചു കാലം കൂടെ, മറ്റൊരു തീരം കണ്ടെത്തും വരെ. അതുവരെ സംയമനം പാലിക്കുക”

“ആർക്കും പ്രയോജനമില്ല എന്നോർത്ത് അവസാനിപ്പിക്കുന്നതിലും നല്ലതല്ലേ ഭൂമിയിൽ ഒരാൾക്ക് വേണ്ടിയെങ്കിലും പ്രയോജനം ചെയ്യാൻ ആ ജീവൻ മാറ്റിവെയ്ക്കുക? #ആത്മഹത്യ “

“പൊയ്മുഖങ്ങളുടെ ഈ ലോകത്ത് തനിച്ചതായാൽ ദുഃഖിക്കരുത്. നിഴലിനെ കൂട്ടുപിടിച്ച് കരുത്തോടെ മുന്നോട്ട് നടക്കുക.കൊടുംചൂടിൽ അവൻ കൂടെ നിൽക്കും, ഇരുളിൽ മറഞ്ഞാലും “

“അവസാന നിമിഷം വരെ ശ്രമം ഉപേക്ഷിക്കരുത്, വിധി തട്ടിപ്പറിക്കുംവരെ. പിന്നീടൊരിക്കലും ഖേദിക്കേണ്ടി വരില്ല. ശുഭദിനം കൂട്ടുകാരെ “

“മറ്റൊരാളുടെ അനുവാദത്തിനായി കാത്തുനിൽക്കാതെ ജീവിതത്തിന്റെ തീരുമാനങ്ങൾ സ്വയം എടുത്ത് ശീലിക്കുക. ആത്മവിശ്വാസത്തിന്റെ ഓരോ പടവുകൾ കേറിത്തുടങ്ങുംപിന്നെയങ്ങോട്ട്”

“സ്വപ്നങ്ങളാണ് പലതും പിന്നീട് പരിശ്രമങ്ങൾക്ക് വളം നൽകുന്നത്. പക്ഷെ പൂവിടുന്നതും അല്ലാത്തവയും വളമിട്ടുതുടങ്ങുമ്പോൾ തന്നെ തിരിച്ചറിയണം. നിരാശപ്പെടേണ്ടി വരില്ല.”

“ഒരു ശതമാനം സാധ്യത ഉള്ള സ്വപ്നത്തെയും വെറുതെ വിടരുത്. വളമിടുക, പരിശ്രമിക്കുക. പൂത്തുതളിർത്തില്ലെങ്കിലും ഖേദിക്കില്ല.”

“കണ്ണുകൾക്ക് കാണാൻ കഴിയില്ലെങ്കിലും
നക്ഷത്രങ്ങൾ അവിടെ തന്നെയുണ്ട്, പകൽ നേരങ്ങളിലും.
കണ്ണിന്റെ പരിമിതികൾക്ക്
താരകങ്ങളെ കുറ്റം പറയാൻ പറ്റുമോ?”

“അബദ്ധങ്ങളെ കൊച്ചു തമാശകളായി കാണാൻ കഴിയണം. ആ കളിയാക്കലുകൾ ചിരിയോടെ ആസ്വദിക്കണം.വലിയ പ്രശ്നങ്ങളെ എളുപ്പം നേരിടാൻ നിങ്ങൾക്കത് തുണയാകും “

“മനോധൈര്യം ചോർത്തിയവയിൽ ചേർക്കപ്പെട്ട നിമിഷങ്ങളിൽ പലതും
ശരിക്കും മനോധൈര്യം നേടിത്തന്നവ ആണെന്ന് തിരിച്ചറിയുന്നത്
കാലങ്ങൾക്കപ്പുറം ആവാം”

“ഒരാൾ നമ്മളെ ജീവിതത്തിൽ വേണ്ടെന്നു വച്ചാൽ, അവിടെ ജീവിതം അവസാനിച്ചു എന്നല്ല, മറിച്ച് അവിടെ പുതിയ ജീവിതം തുടങ്ങി എന്ന് വേണം കരുതാൻ. ഏതു നെഗറ്റീവ് കാര്യത്തെയും ഇങ്ങനെ പോസിറ്റീവ് ആക്കി തീർക്കാനുള്ള കഴിവ് മനസ്സിനുണ്ട്”

“തിരഞ്ഞെടുക്കുന്ന മാർഗം അനുസരിച്ചായിരിക്കും ജയപരാജയങ്ങൾ നിർണയിക്കുക, ലക്ഷ്യത്തിൽ എത്തിച്ചേരാൻ എടുക്കുന്ന സമയത്തിന്റെ ദൈർഘ്യവും.”

“നിശാശലഭങ്ങൾ പോലെയാണ് സ്വപ്‌നങ്ങൾ, വർണഭേദങ്ങൾ കുറവാണ്.  സ്വപ്നങ്ങൾക്ക് മാരിവില്ലിൻ നിറച്ചാർത്തും ശോഭയും നൽകാൻ പ്രയത്നങ്ങൾക്ക് കഴിയും.”

“വാക്കുകൾ കൊണ്ട് ചുറ്റുമുള്ളവർ കാരണങ്ങളില്ലാതെ ആക്രമിക്കുമ്പോൾ ഒന്നോർക്കുക, നിങ്ങളുടെ ഉയർച്ചയിൽ അവർ സന്തുഷ്ടരല്ല. കാരണങ്ങൾ തിരഞ്ഞ് നമ്മുടെ സന്തോഷം കളയണോ “

“കാത്തു നിൽക്കുമ്പോൾ മരണം എത്തണമെന്നില്ല, അപ്രതീക്ഷിതമായി കടന്നുവന്നു എന്നുംവരാം. ജനനം & മരണം എന്ന രണ്ടു ബിന്ദുക്കൾക്കിടയിൽ എത്രത്തോളം ഭംഗിയായി പറന്നുനടക്കാം, ഒരു പെൻഡുലംപോലെ ചിന്തകളിൽ എത്രത്തോളം oscillateചെയ്യാം എന്നാണ് ഒരു മിന്നല്പിണരുപോലെ കടന്നുപോകുന്ന ഈ ജീവിതയാത്രയ്ക്കിടയിൽ ചിന്തിക്കേണ്ടത്”

“പറയാൻ എളുപ്പമാ ഒന്നും പ്രതീക്ഷിക്കാതെ കർമം ചെയ്യാൻ. പക്ഷെ എടുക്കുന്ന പ്രയത്നം അംഗീകരിക്കപ്പെടണം. അല്ലെങ്കിൽ അതൊരു ക്ഷീണം തന്നെയാ…..”

“ചില ഇന്നലെകളുടെ സന്തോഷം നാം വെറുത്തവർക്കു കൂടി അവകാശപ്പെട്ടതാണ് . അവരുടെ പരാജയം നമുക്ക് നേടിത്തന്ന വിജയങ്ങൾ. “

“പ്രതികാരബുദ്ധി നല്ലതാ, മുന്നോട്ടുള്ള യാത്രക്ക്, വളർച്ചക്ക്. പക്ഷെ അത് സ്വയം അധപതിച്ചുകൊണ്ടാകരുത് എന്ന് മാത്രം “

“സന്തോഷത്തേക്കാൾ ദുഃഖങ്ങളെ കണ്ടെത്തിപിടിക്കാനാണ് കൂടുതൽ എളുപ്പം… എന്താണെന്നറിയില്ല മനുഷ്യമനസ്സുകൾക്കെപ്പോഴും അതിനോടാണ് കൂടുതൽ താല്പര്യം. ഒരു പ്രത്യേകകഴിവ് ഉണ്ടെന്നു തന്നെ പറയാം. മറിച്ചായാൽ നിങ്ങളുടെ ചെറിയലോകത്തിൽ തന്നെ വലിയ സന്തോഷങ്ങൾ സൃഷ്ടിക്കാനാവും”