എനിക്ക് നിന്നോട് പറയുവാനുള്ളത്

“ചോദിക്കേണ്ട കാര്യങ്ങൾ അവസരങ്ങൾ കിട്ടുമ്പോൾ ചോദിക്കുക. ഒരുപക്ഷെ പിന്നീടൊരിക്കലും അവസരം കിട്ടിയില്ല എന്ന് വരാം”

“വാശിയോടെയാണ് മത്സരിച്ചത് നമ്മളിരുവരും
നിന്റെ മനസ്സ് കണ്ടില്ലെന്നു നടിക്കാൻ ഞാനും
എന്റെ മനസ്സ് കണ്ടില്ലെന്നു നടിക്കാൻ നീയും.
ഒടുവിൽ നീ എനിക്ക് വിട്ടു തന്നു💫✨🌪️🌈💕😉”

“എത്ര വൈവിധ്യമാർന്ന കഥകളാണ് നമ്മളൊരുമിച്ചു തിരക്കഥയെഴുതി അഭിനയിച്ചുതീർത്തത്! ഓരോ കഥയിലും നമ്മൾ വ്യത്യസ്ത കഥാപാത്രങ്ങൾ. പരിചിതരായും അപരിചിതരായും ആടിതിമിർത്ത എത്ര അധ്യായങ്ങൾ, മറ്റാർക്കും അറിയാത്തവ. മറ്റു കഥകളിലെ നമ്മളെ കണ്ടതായ്പോലും നടിക്കാതെ, അഭിനയത്തിൽ പരസ്പരം മത്സരിക്കാറില്ലേ പലകുറി നമ്മൾ, ഇന്നും തുടരുന്ന ഈ തുടർനാടകത്തിൽ”

“ഞാനെഴുതുന്ന അക്ഷരങ്ങളിൽ
നിനക്ക് നിന്നെ വായിച്ചെടുക്കാൻ കഴിയുന്നില്ലെങ്കിൽ
നിന്നിൽ ഞാൻ എന്നോ ഒരു നാൾ മരിച്ചുപോയി എന്നാണ്,
ഒരുപക്ഷെ നിന്നെ നീ അറിയുന്നതിലും വളരെ പണ്ട്”

“വാക്കുകൾ വേണമെന്നില്ല
എങ്കിലും നീ എന്റെ ചാരെയുണ്ടെങ്കിൽ… അത് മതി
വളരെ പതിയെ എങ്കിലും
നീ എന്നോടൊപ്പം നടന്നാൽ… അത് മതി
ഞാനൊന്നു കിതച്ചു നിന്നുപോയാൽ
ഒന്ന് കൈ നീട്ടിയാൽ… അത് മതി
എപ്പോഴെങ്കിലും എനിക്ക് വാക്കുകൾ നഷ്ടപ്പെട്ടാൽ
നിന്റെ കണ്ണുകൾകൊണ്ട് ആശ്വസിപ്പിച്ചാൽ… അത് മതി”

“നിന്റെ സാമീപ്യം എന്റെ ആയിരം ശരത്കാലങ്ങളെ പുഷ്പിക്കുമ്പോൾ അതിനൊരു പ്രത്യേക സൗരഭ്യമുണ്ട്. അപ്പോൾ എനിക്ക് നിന്നോട് പറയുവാൻ തോന്നും എന്റെ വേനൽകാലത്തിനും വർഷകാലത്തും നീ കൂടെയുണ്ടാവണമെന്ന്…. എന്റെ വാടിക്കരിഞ്ഞ പൂക്കളിൽ നമ്മൾക്കൊരുമിച്ചു വസന്തം പുഷ്പിക്കാമെന്ന്… അങ്ങനെ തീർക്കുന്ന പൂങ്കാവനത്തെ മേഘങ്ങളും താരങ്ങളും ചന്ദ്രികയാലും അലങ്കരിക്കാമെന്ന്….
നീ എന്റെ കൂടെ ഉണ്ടാവില്ലേ?”

“നിന്നരികിൽ നിൻ നിഴലിനേക്കാളും അടുത്ത് ഞാൻ നിൽക്കുന്നത് എപ്പോഴെങ്കിലും നീ ശ്രദ്ധിച്ചിട്ടുണ്ടോ? എന്റെ സാമീപ്യം കൊതിക്കും നിമിഷങ്ങളിൽ ഒന്ന് തിരിഞ്ഞു നോക്കിയാൽ മതി, നിനക്കവിടെ എന്നെ കാണാൻ കഴിയും, നിന്റെ ഹൃദയത്തുടിപ്പുകളുടെ കണക്കെടുക്കുന്ന എന്നെ.”

“നിന്നെ ഭൂതകാലത്തിൽ ചികഞ്ഞു ഞാൻ മടുത്തു
എനിക്കിനി വേണ്ടത് നമ്മളോരുമിച്ചുള്ള
ഒരുപിടി നിമിഷങ്ങളാണ്,
വർത്തമാനവും ഭാവിയും ഇഴുകിച്ചേർന്നത്.
അത് നീയെനിക്ക് തരുന്ന നിമിഷം
ഓർമകളുടെ വാതായനം ഞാൻ താഴിട്ട് പൂട്ടും”

“നിന്നെ ഞാൻ അറിയുന്നു എന്ന് പറയുന്ന ഓരോ നിമിഷവും
ഞാൻ പറയാതെ പറയുന്ന ഒരു കാര്യമുണ്ട്,
നിന്നെ ഞാൻ മനസിലാക്കുന്നു”