“നിന്നോട് പറഞ്ഞ കഥയൊന്ന്
ശരിക്കുള്ള കഥ മറ്റൊന്ന്.
ഇത് രണ്ടിനുമിടയിൽ
വാക്കുകളില്ലാതെ പറഞ്ഞ കഥ വേറൊന്ന്”
 
“പൂർത്തിയാവാത്ത കഥകൾക്ക് എപ്പോഴും ഒരു പ്രതീക്ഷയുണ്ട്
പൂർത്തീകരിക്കാത്ത ചിത്രം പോലെ വീർപ്പുമുട്ടിക്കുമെങ്കിലും”
 
“സങ്കടങ്ങൾ പലപ്പോഴും ആരോടും പറയാൻ കഴിയില്ല.
പറഞ്ഞാലും ആരും വിശ്വസിക്കില്ല.
കാരണം, കെട്ടുകഥകളേക്കാൾ അത്ഭുതമാണ്
പലരുടെയും ജീവിതങ്ങൾ😔🥺” 
 

കഥകൾ

കഥകൾ

“കെട്ടുകഥകൾ പലതും രചിക്കേണ്ടി വന്നേക്കാം,
കടംകഥകൾക്ക് ഉത്തരം കണ്ടെത്താൻ കഴിയാതെ വരുമ്പോൾ”
 
“നീ അറിഞ്ഞുവോ അറിഞ്ഞില്ലയോ എന്ന്
എനിക്ക് തന്നെ നിശ്ചയമില്ലാത്ത കഥകൾ ഒരായിരം ഉണ്ട് “
 
“എത്ര പെട്ടെന്നാണ് കഥകൾ പഴംകഥകളായ് മാറുന്നത്”
 
“മൗനത്തിൻ ഭാഷയിലാണ് ഞാനെന്റെ
കഥകളെല്ലാം നിന്നോട് ചൊല്ലാറുള്ളത്
എന്റെ ഹൃദയത്തിന്നാഴങ്ങളിൽ നീ മുങ്ങിത്തപ്പി
ഓരോ കണ്ണീർമുത്തിനെയും
നിന്റെ ഹൃദയത്തോടു ചേർക്കുമെന്ന വിശ്വാസത്തിൽ.
വിശ്വാസങ്ങൾ പലതും തോന്നലുകളിലേക്ക് വഴിമാറിയത്
കാലത്തിൻ കേളികളാവാം, കൗതുകങ്ങളാകാം🌈✨💫 “
 
“എഴുതാൻ ഒരുപാട് താളുകൾ ഒഴിച്ചിട്ടിട്ടുണ്ട്‌ നിനക്ക് വേണ്ടി
പക്ഷെ എഴുതാൻ ഒന്നുമില്ല എന്ന് മാത്രം”
 
“ഒരിക്കൽ തീർത്തും അസാധാരണമായിരുന്ന കാര്യങ്ങൾ
സാധാരണമായ് തോന്നിയേക്കാം ……
പിന്നീടവ തിരിച്ചും.
ഒരിക്കലും മനസ്സിനോ ശരീരത്തിനോ
ചെന്നെത്താൻ കഴിയാത്ത കടമ്പകൾ,
തീർത്തും അവിശ്വസനീയമായ കെട്ടുകഥ പോലെ”
 
“എന്നും കൂടെയുണ്ടാവും എന്ന പ്രതീക്ഷയിൽ
ഒപ്പം കൂട്ടുന്ന പലരും പലവഴിക്ക് പിരിഞ്ഞുപോകും
പല നാല്കവലകൾ കൂടുമ്പോൾ
പുതിയ സഹയാത്രികരെ കിട്ടുമ്പോൾ.
നമുക്കെന്നും ശരണം ഈ നാലമ്പലങ്ങളാണ്
അതാവുമ്പോൾ ആരെയും കാത്തിരിക്കേണ്ട
അപരിചിതർ പല ദിക്കിൽ നിന്നും വന്നുചേരാം,
വീണ്ടും കഥയിതു തുടരും”
 
“നിനക്ക് വേണ്ടി എഴുതിയ എല്ലാ കഥകളിലും ഞാനുണ്ടായിരുന്നു
കൂടാതെ ഞാൻ ചിലതു നിനക്ക് വായിച്ചു തന്നതിലും”
 
“വാക്കുകൾ ഇല്ലാത്ത ചില വേദനകളുണ്ട്
കണ്ണുനീരിനു കഥപറയുവാനാവാത്ത നൊമ്പരങ്ങളുണ്ട്
സങ്കീർണ്ണമായ ചിന്തകളിൽ തട്ടി
മോചനമില്ലാത്ത ഇടനാഴികളിലൂടെ അലയുന്നവ”
 
“എന്റെ ഏഴഴകുള്ള മഴവില്ലിലെ ഏതു വർണമാണ് നീ?
നീ എന്നിൽ ഒളിപ്പിക്കുന്ന വർണമെപ്പോഴും ചുവപ്പാണ്
ഭ്രാന്തിന്റെയും ചോരയുടെയും നിറം
പ്രണയത്തിന്റെയും യുദ്ധങ്ങളുടെയും കഥകൾ –
കോറിയെഴുതുന്ന നിറം
മഴവില്ലിൻ അവസാനമലിയുന്ന വർണവും….
മാണിക്യത്തിൻ അരുണിമയുടെ ചേലും പറയാതെ വയ്യ”
 
“ആരെങ്കിലും പറഞ്ഞാൽ വിശ്വസിക്കുമോ
എന്റെ കഴിഞ്ഞുപോയ കഥയിലെ
ദുഃഖസാന്ദ്രമായ ഒരു അധ്യായത്തിലാണ്
നമ്മൾ പരസ്പരം കണ്ടുമുട്ടിയതെന്ന് 🦋✨💫🌪️♾💜💙”
 
“ചില അനുഭവങ്ങൾ പകർന്നു നൽകാൻ വേണ്ടി മാത്രം ചില യാത്രകൾ, പിന്നീടുള്ള ജീവിതകഥയുമായ് യാതൊരു ബന്ധവുമില്ലാത്തവ….”
 
“മായുന്ന ഓർമ്മകൾ പലപ്പോഴും കൈപിടിച്ച് കൂടെ കൊണ്ടുപോകുന്നത് പിരിഞ്ഞുപോയ പലരുടെയും അവസാന ശേഷിപ്പുകളെ. പിന്നെല്ലാം പഴയ പടി, പുതിയ കഥകൾ പുതിയ ബന്ധനങ്ങൾ”
 
“നിറമില്ലാത്ത ഒരു കഥയാണ് ഞാൻ.
എന്നാൽ ലോകം കാണുന്നതോ….
ഇന്ദ്രധനുസ്സിൽ ചാലിച്ച
ഏഴു വർണങ്ങളായ്!!”
 
“നമ്മൾ ഇരുവരും പറഞ്ഞുവന്നത് ഒരേ കഥയാണെന്ന് മനസ്സിലാക്കാൻ കുറച്ചു സമയമെടുത്തു; ആ കഥ പിറവിയെടുത്തത് യുഗങ്ങൾക്കപ്പുറമെന്നും”
 
“കഥ പറഞ്ഞു തുടങ്ങിയപ്പോൾ
രണ്ടു വ്യത്യസ്ത ദ്രുവങ്ങളിലെ കഥ പോലെ.
എന്നാൽ ഇടവേളയിലെവിടോ അവ കണ്ടുമുട്ടി
ഭൂമധ്യരേഖയിലെന്ന പോലെ.
അവിടെ വച്ച് ഞങ്ങൾ തിരിച്ചറിഞ്ഞു
നമ്മളിരുവരും പറഞ്ഞു വരുന്നത്
ഒരു കഥയാണെന്ന്!!”
 
“പാഴാക്കുന്ന ഓരോ നിമിഷത്തിനും ഒരു മടക്കയാത്ര ഇല്ല. ഓരോ നിമിഷത്തിനും കോർത്തിണക്കാൻ ഒരു കഥ സമ്മാനിച്ച് സന്തോഷത്തോടെ പറഞ്ഞു വിടുക. “
 
“മാഞ്ഞത് ഒരു ഞൊടിക്ക് മാത്രം…… മാരിവില്ലായി പുനർജനിക്കുവാൻ!!! നൽകിയ നീലവർണത്തെ ആകാശത്തിനു നൽകിയിട്ട് ഏഴുവർണങ്ങളിൽ പുതിയൊരു കഥ കൂട്ടിച്ചേർക്കുവാൻ വർഷമേഘത്തുള്ളികളായ് മടങ്ങിയെത്തുവാൻ”
 
“സ്നേഹം പ്രകടിപ്പിച്ചില്ലെങ്കിൽ
പരിഭവം, ദേഷ്യം
പ്രകടിപ്പിച്ചാലോ മൗനം.
വിചിത്രമായ ഒരു പ്രണയകഥയാണ് നമ്മളുടേത്.
മഴപോലെ ചൊരിയുന്ന വാക്കുകൾക്കും
അഗാധമായ നിശബ്ദതകൾക്കുമിടയിൽ
ഇന്നും പ്രയാണം തുടരുന്ന
ഒരു കഥയാണ് നമ്മളുടേത്.”
 
“നമ്മൾ കേൾക്കാറില്ലേ പലരും പറയുന്നത്, എന്റെ പോരാട്ടങ്ങളെല്ലാം തനിച്ചായിരുന്നു, എന്നെ മനസ്സിലാക്കിയവർ ചുരുക്കം. ശരിയാണ്, എല്ലാർക്കും നമ്മളെ മനസിലാക്കണമെന്നില്ല. നമ്മുടെ കഥയുമായി സാദൃശ്യമുള്ളവർക്കേ നമ്മൾ പറയുന്നതിന്റെ അർത്ഥം ശരിക്ക് മനസ്സിലാവൂ, നമ്മളെ ആശ്വസിപ്പിക്കാനാവൂ, സഹായിക്കാനാവൂ”
 
“വ്യത്യസ്ത ടൈംസോണിയും വ്യത്യസ്ത ഇടങ്ങളിലും
വ്യത്യസ്ത മനസ്സോടെ ജീവിക്കുന്നവർ നാമോരുത്തരും
ഓരോ ഭൂഖണ്ഡം പോലെ.
എങ്കിലും എല്ലാരും വിഡ്ഢികളെ പോലെ വിചാരിക്കുന്നത്
എന്നെ എല്ലാർക്കും മനസ്സിലാവും
എന്റെ കഥ എല്ലാർക്കും മനസ്സിലാവും!!!”
 
“ഓരോ യാത്രകൾ ഓരോ അനുഭവകഥകൾ അവ സൂക്ഷിച്ചു വച്ചോളൂ…. വീണ്ടും ആ വഴി വരുമ്പോൾ ഇടറിവീഴാതിരിക്കാൻ……”
 
“ഒന്നും പറയാതെ പ്രിയപ്പെട്ട പലരും നമ്മുടെ ജീവിതത്തിൽ നിന്നും യാത്രയാവുമ്പോൾ എന്തൊക്കെ കഥകളാവും പൂരിപ്പിക്കാത്ത സമസ്യകൾപോൽ ബാക്കിവെച്ചിട്ട് പോവുക!”
 
“ഒരുമിച്ചൊഴുകിയ നദികൾ വേർപിരിയുകയായ്
രണ്ടു ദിക്കുകളിലേക്ക്, രണ്ടു കടലുകളിലേക്ക്
എണ്ണമറ്റ പരിഭവങ്ങൾ ബാക്കിവച്ച്
എണ്ണമറ്റ കഥകൾ മൗനത്തിന്‌ കടംപറഞ്ഞ് ✨💫🌪️🖤🦋”
 
“എത്ര ഒഴിഞ്ഞു മാറിയാലും
ചില അനുഭവ കഥകൾ നമുക്ക് മാത്രം സ്വന്തം
അതിന്റെ കയ്പ്പ്, ചവർപ്പ്, മധുരം
എല്ലാം എല്ലാം…..”
 
“എത്ര വൈവിധ്യമാർന്ന കഥകളാണ് നമ്മളൊരുമിച്ചു തിരക്കഥയെഴുതി അഭിനയിച്ചുതീർത്തത്! ഓരോ കഥയിലും നമ്മൾ വ്യത്യസ്ത കഥാപാത്രങ്ങൾ. പരിചിതരായും അപരിചിതരായും ആടിതിമിർത്ത എത്ര അധ്യായങ്ങൾ, മറ്റാർക്കും അറിയാത്തവ. മറ്റു കഥകളിലെ നമ്മളെ കണ്ടതായ്പോലും നടിക്കാതെ, അഭിനയത്തിൽ പരസ്പരം മത്സരിക്കാറില്ലേ പലകുറി നമ്മൾ, ഇന്നും തുടരുന്ന ഈ തുടർനാടകത്തിൽ”
 
“അസാധാരണമായ നിറങ്ങളും
പര്യവേക്ഷണം ചെയ്യപ്പെടാത്ത ആഴങ്ങളും
ആരും കേൾക്കാത്ത വ്യാഖ്യാനങ്ങളും
നിറഞ്ഞതാണ് നമ്മുടെ കഥ”
 
“അന്ന് എന്റെ സായാഹ്നസൂര്യന്റെ നിറം മങ്ങിയിരുന്നു
മഴവില്ലുകൾ പലതും എന്റെ നിറങ്ങൾ കടമെടുത്തു പറയാതെ പോയി
അപ്പോൾ പൊഴിഞ്ഞു വീണു എന്റെ മുന്നിലൊരു താരകം
മറ്റേതോ ലോകത്തു നിന്ന്, എനിക്കായി ഭൂമിയിൽ ഇറങ്ങിവന്നപോലെ
ഇരുളിന്റെ മടിത്തട്ടിൽ നാമിരുവരും
കഥകൾ കൈമാറിയ ഏതോ ഒരു നിമിഷം തിരിച്ചറിഞ്ഞു
ഞാൻ നിന്നിലും, നീ എന്നിലും
യുഗങ്ങൾക്ക് മുമ്പേ പിറവിയെടുത്തവരാണെന്ന്
നാമിരുവരും പറഞ്ഞത് ഒരു കഥയായെന്നും”
 
“പറഞ്ഞ വിസ്മയ കഥകളേക്കാൾ ജനിക്കാത്ത കഥകളാണ് ഏറെ!!”
 
“എല്ലാം അനുഭവകഥകളിൽ എഴുതിച്ചേർത്താൽ
പിന്നെ ജീവിക്കുന്നതെപ്പോഴാ?
നിമിഷങ്ങളും വേണം ജീവിതത്തിൽ,
അനുഭവങ്ങൾ മാത്രമല്ല”
 
“ആരെങ്കിലും ചിന്തിച്ചിട്ടുണ്ടോ പ്രതീക്ഷ നൽകി കടന്നു കളയുന്ന സന്ധ്യ എവിടേക്കാണ് പോകുന്നതെന്ന്? ഒരുപക്ഷെ അവൾക്കും പറയാൻ ഒരുപാട് കഥകൾ ഉണ്ടെങ്കിലോ, അവിശ്വസനീയമെന്നു മറ്റുള്ളവർക്ക് തോന്നാമെങ്കിലും?” 
 
“കഥകൾ വീണ്ടും വീണ്ടും വിവരിച്ചുപറയുമ്പോൾ
കഥാപാത്രങ്ങൾ തന്നെ മാറിപോവുന്നർ!
കഥകൾ എത്ര മാറി വന്നാലും
ഒരേ കഥാപാത്രമായ് തന്നെ പലകുറി
സദസ്സിൽ വേഷമണിഞ്ഞു നിറഞ്ഞാടുന്നവർ!!!”
 
“കേൾക്കുമ്പോൾ സുപരിചിതം എന്ന് തോന്നിയാലും
ചില കഥകൾ എല്ലാർക്കും അവകാശപ്പെട്ടതല്ല.
കേൾക്കുമ്പോൾ വെറും കെട്ടുകഥകൾ മാത്രമെന്ന് തോന്നുന്ന കഥകളുമുണ്ട്.
യാഥാർഥ്യങ്ങൾക്ക് വളരെയടുത്ത് എന്ന് തോന്നിപ്പിച്ചു നിർത്തുന്ന
ചില കെട്ടുകഥകൾ!!”
 
“കേൾക്കാൻ ആളില്ല എന്നറിയാമായിരുന്നിട്ടും
വാതോരാതെ പറഞ്ഞുതീർക്കുന്ന കാക്കത്തൊള്ളായിരം കഥകൾ”
 
“വാക്കുകൾ നരച്ചു തുടങ്ങിയിരിക്കുന്നു
ജരാനരകൾ ബാധിച്ചവ ഇന്ന് മൗനത്തിലാണ്ടുകിടക്കുന്നു.
കഥകൾ പഴങ്കഥകളായ് മാറുമ്പൊഴും
ഓർമ്മകൾ കാലയവനികയ്ക്കുള്ളിൽ മറയുമ്പൊഴും
പലചോദ്യങ്ങൾ മാത്രം ബാക്കിയാവും
ഉത്തരങ്ങൾ കിട്ടാൻ ആരെ കാത്തുനിൽക്കണമെന്നറിയാതെ”
 
“ജീവിതയാത്ര അവസാനിച്ചപോലെ….
പറയാൻ പല കഥകളും ബാക്കിയുണ്ടെങ്കിലും”
 
“പുരാണകഥയിലെ ദുഷ്യന്തനെ പോലെ എല്ലാവരും
തന്റെ നഷ്ടപ്രണയത്തെ ഓർക്കണമെന്നില്ല”
 
“നീ എൻ വിളികൾക്ക് മറുപടി പറഞ്ഞുവെങ്കിൽ,
ഞാൻ ഒരായിരം തവണ നിന്നെ വിളിച്ചേനേ.
നീ എന്റെ വാക്കുകൾ കേട്ടുവെങ്കിൽ,
ഞാനായിരം കഥകൾ പറഞ്ഞേനെ.
പക്ഷേ നീ യുഗങ്ങൾ പലതും സഞ്ചരിച്ചിരിക്കുന്നു
എന്റെ വിളികളുടെയും വാക്കുകളുടെയും –
മാറ്റൊലികൾക്കുമപ്പുറം.
എന്റെ ആത്മാവ് വീണ്ടും
വിളിച്ചു കൊണ്ടിരിക്കുമായിരിക്കും നിന്നെ
എന്നിലേക്കെരിക്കലും എത്താതെ പോയ
ആ ശൂന്യത്തിലേക്കുള്ള യാത്രകൾക്കിടയിൽ”
 
“നീ പോയി മറഞ്ഞെങ്കിലും
നീ നൽകിയ വേദന ഞാൻ മറന്നിട്ടില്ല
പാതി മടങ്ങിയ രാവ് പോലെ
പെയ്തൊഴിയാതെ മഴ കനൽ പോലെ
മണലാരണ്യത്തിൽ പുഷ്പിച്ച ഗുൽമോഹർ പോലെ
വിരഹത്തിൻ കദനകഥകൾ
ആവർത്തിച്ചുരുവിട്ട്
നെടുവീർപ്പുകളിൽ മുഴുകുന്നു ഞാൻ….
ആശകളറ്റ്!!!”
 
“കഥകൾ എഴുതി തുടങ്ങുമ്പോൾ തന്നെ
അവ അവസാനിക്കുന്നത് എങ്ങനെയെന്ന് അറിയാമായിരുന്നെങ്കിൽ!!!”
 
 
 
(Visited 22 times, 1 visits today)