ഹൃദയത്തിൽ ചുമന്ന്

നീയെന്റെ വെറും തോന്നലുകളിലേക്ക് –
ചുരുങ്ങുകയാണിപ്പോൾ.
അവിടെ ഒരു ചെറിയ കളിവീടുണ്ടാക്കി
നിന്നെ കുടിയിരുത്താനാനുള്ള
ചിന്തകളിലാണിപ്പോൾ മനസ്സ്.
മിഥ്യക്കും സത്യത്തിനുമിടയിലുള്ള
ഇരുണ്ടമേഘകൂട്ടത്തിൽ
ഞാനിങ്ങനെ വീർപ്പുമുട്ടുമ്പോൾ
ഒരു പേമാരിയായി പെയ്തൊഴിയാൻ തോന്നാറുണ്ട്
ചിലപ്പോഴെങ്കിലും.
പക്ഷെ മേഘക്കൂട്ടങ്ങൾക്കിടയിൽ ഞാൻ പണിത-
കളിവീടെന്തുചെയ്യും?
അതോർത്തുമാത്രം, പെയ്തൊഴിയാതെ
കാർമേഘക്കെട്ടിനുള്ളിൽ എന്നെയൊളിപ്പിച്ച്
ഒഴുകി നീങ്ങുകയാണ് ഞാനിപ്പോഴും
നിന്നെയും ഹൃദയത്തിൽ ചുമന്ന്